इस्लामावाद- लोडसेडिङ बढेको भन्दै पाकिस्तानको खैबर पख्तुनख्वा प्रान्तमा प्रदर्शनको आयोजना गरिएको छ । प्रान्तको घलानाइ ऊर्जा केन्द्रअघि स्थानीय बासिन्दाहरुले लोडसेडिङको विरोधमा प्रदर्शन गरेका हुन् ।

स्थानीयको प्रदर्शनका कारण पेशावर–बजनौर राजमार्ग अवरुद्ध भएको पाकिस्तानबाट प्रकाशित हुने डन अखबारको अनलाइन संस्करणले जनाएको छ । प्रदर्शनका कारण यात्रीहरु मर्कामा परेको डनले जनाएको छ ।

सो क्षेत्रमा ट्राइबल इलेक्ट्रिक सप्लाई कम्पनी (टेस्को) ले विद्युत आपूर्ति गर्दै आएको छ । प्रदर्शनकारीले टेस्को, जिल्ला प्रशासनविरुद्ध नाराबाजी गरेका थिए । प्रदर्शनकारीले लोडसेडिङका कारण पूरै जिल्ला अस्तव्यस्त भएको आरोप लगाएका छन् ।

स्थानीय अधिकारीले एक वर्षअघि भएको सम्झौता तत्काल लागू गर्ने आश्वासन दिएपछि प्रदर्शन साम्य भएको डनले जनाएको छ ।