काठमाडौं – सर्वोच्च अदालतमा प्रस्तावित न्यायाधीशमध्ये दुई जनामाथि उजुरीकर्ताले गम्भीर आरोप लगाएका छन् ।

सर्वोच्च अदालतका प्रस्तावित न्यायाधीशद्वय टेकप्रसाद ढुंगाना र सारंगा सुवेदी उच्च अदालतको न्यायाधीश पदमा रहँदा गैरकानूनी फैसला गरेको उजुरीकर्ताले आरोप लगाएका हुन् ।

आज सर्वोच्च अदालतमा प्रस्तावित ६ जना न्यायाधीशविरुद्ध परेको उजुरीमाथिको छलफलमा भाग लिँदै उजुरीकर्ता पुष्पप्रसाद गुरागाईंले संविधानविपरीत उच्च अदालत पाटनमा रहँदा ढुंगानाले भन्सारको मुद्दा र चमेलियाको मुद्दामा राज्यलाई करोडौँ नोक्सान बनाएर मुद्दा फैसला गरेकाले उनलाई सर्वोच्च अदालतको न्यायाधीश पदमा अनुमोदन नगर्न संसदीय समितिका सदस्यलाई आग्रह गरेका थिए ।

अर्का उजुरीकर्ता चिरञ्जीवीभक्त पौडेलका तर्फबाट बोल्दै खडकभक्त पौडेलले राकेशभक्त पौडेल हत्याकाण्डको फैसलामा पीडित पक्षको समेत सुनुवाइ नगरेकाले सारंगा सुवेदीलाई पनि सर्वोच्च अदालतको न्यायाधीशमा अनुमोदन नगर्न समितिसमक्ष आग्रह गरेका थिए । ३३ किलो सुन प्रकरणका अभियुक्तलाई रिहा गर्ने फैसला पनि सुवेदीले गरेको आरोप उनले लगाएका थिए ।

न्यायपरिषदको मंसिर ५ गते बसेको बैठकले सर्वोच्च अदालतको न्यायाधीशमा सारंगा सुवेदी, अब्दुल अजिज मुसलमान, महेश शर्मा पौड्याल, टेकप्रसाद ढुंगाना, सुनिल पोखरेल र बालकृष्ण ढकालको नाम सिफारिस गरेको थियो ।

उनीहरूविरुद्ध १० वटा उजुरी संसदीय सुनुवाइ समितिमा परेको थियो । ती उजुरीमाथिको छलफल आज सकिएको छ ।

संसदीय सुनुवाइ समितिले उनीहरूको नाम अनुमोदन गरेपछि राष्ट्रपतिले नियुक्त गर्ने संवैधानिक व्यवस्था छ । समितिको अर्को बैठक आगामी मंसिर २९ गते बिहान ११ बजेका लागि बोलाइएको छ ।

यो पनि…