काठमाडौं- दक्षिण अफ्रिका पठाइदिन्छु भन्दै ठगी गरेको आरोपमा एक जना पक्राउ परेका छन् । पक्राउ पर्नेमा झापाको बिर्तामोड घर भई हाल काठमाडौंको गौरीघाट बस्ने १८ वर्षका अन्जेश गिरी रहेको प्रहरीले जनाएको छ ।

उनलाई काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले सिनामंगलबार शुक्रबार पक्राउ गरेको हो ।

उनले विजय खत्रीसहित २ जनालाई वैदेशिक रोजगारीका लागि दक्षिण अफ्रिका पठाइदिन्छु, त्यसका लागि प्रतिव्यक्ति ८ लाख ५० हजार रुपैयाँ लाग्छ र त्यहाँ मासिक १ लाख २० हजार रुपैयाँ तलबमा प्रतिष्ठित कम्पनीमा काम लगाइदिन्छु भन्दै प्रलोभनमा पारी पीडितबाट पटकपटक गरी जम्मा १७ लाख रुपैयाँ रकम लिई सम्पर्कविहीन भएका थिए ।

प्रहरीले उनलाई थप अनुसन्धान तथा कारवाहीको लागि वैदेशिक रोजगार विभाग ताहाचल पठाइएको जनाएको छ ।