हेटौँडा- प्रधानमन्त्री पुष्पकमल दाहाल प्रचण्डले निरंकुश राजतन्त्रका दलालहरु र भ्रष्ट गुण्डाहरुले लोकतान्त्रिक आन्दोलनका नेतामाथि खुलेआम खुकुरी हानेको टिप्पणी गरेका छन् ।

मकवानपुरको हेटौँडामा आयोजित समाजवादी मोर्चाको सन्देशसभालाई सम्बोधन गर्दै प्रधानमन्त्री प्रचण्डले निरंकुश राजतन्त्रका दलालहरू, भ्रष्ट गुण्डाहरुले लोकतान्त्रिक आन्दोलनका नेतामाथि खुलेआम खुकुरी हानेको घटना सामान्य नभएको बताए ।

केही समयअघि काठमाडौँको भृकुटीमण्डपमा नेपाली कांग्रेसका सहमहामन्त्री महेन्द्र यादवमाथि भएको सांघातिक आक्रमणतर्फ सङ्केत गर्दै प्रधानमन्त्री प्रचण्डले यसतर्फ सचेत हुनुपर्ने बताए ।

उनले आफूहरु कमजोर भएपछि कसरी प्रतिक्रान्तिकारीहरुको टाउको उठ्दोरहेछ भन्ने देखिएकोसमेत टिप्पणी गरे । उनले जनक्रान्तिलाई अपमानित गर्न खोज्ने प्रवृत्तिलाई परास्त गर्नुपर्ने बताउँदै केही समयपछि राष्ट्रियता, गणतन्त्र र जनजीविकालाई लिएर हामीले लाखौं जनतालाई सडकमा ल्याउने बताए ।

प्रतिक्रान्तिकारी, दक्षिणपन्थी, निरंकुशतावादी, सामन्तवादी दलालहरुको सातो जानेगरी जनताको तागत प्रदर्शन गर्नुपर्ने उनको भनाइ छ ।