काभ्रे– नेकपा (एमाले) का अध्यक्ष केपी शर्मा ओलीले वन क्षेत्रलाई रोजगारी सिर्जना र आम्दानीको स्रोतका रूपमा विकास गर्नुपर्ने बताएका छन् । 

सामुदायिक वन दिवस-२०८० का अवसरमा आज काभ्रेपलाञ्चोकको धुलिखेल नगरपालिका-२ रविस्थित अल्छेचौरमा नेकपा (एमाले) वन तथा वातावरण विभागद्वारा आज आयोजित बृहत् वृक्षरोपण कार्यक्रममा उनले वन क्षेत्रको सुरक्षा गर्दै यसको बहुआयामिक ढंगले उपयोग गर्नुपर्ने बताएका हुन् ।   

‘अबको समयमा वन क्षेत्रलाई रोजगारी र आम्दानीको स्रोत बनाउने काम गर्नुपर्दछ’, पूर्व प्रधानमन्त्री ओलीले भने, ‘वनक्षेत्रलाई व्यवस्थितरूपले सुरक्षित गर्दै ठूला रुखमा लहरेफल तथा मसलाजन्यलगायत फलफूल हावापानी अनुकूल रोपेर सदुपयोग गर्नुपर्दछ ।’ उनले सामुदायिक वनसँग मिलेर ‘वनलाई वनको रूपमा विकास गर्न’ स्थानीय तहलाई आग्रह गरे ।  

अध्यक्ष ओलीले खेर गएका ठाउँलाई वृक्षरोपण गरी सुन्दर र आकर्षित पर्यटकीयस्थल बनाउन सकिने बताए। उनले भने, ‘स्थानीय तहले त अब हावापानी अनुकूल हेरेर स्थानीय वन-जंगललाई कृषि वनका रूपमा विकास गर्नुपर्दछ ।’

केही वर्षदेखि वैज्ञानिक वन-जंगलका नाममा पुराना सालघारी नष्ट गरिएकोमा उनले दुःखेसो पोख्दै दीर्घकालीन सोच नबनाउँदा आफूले नियन्त्रण गर्ने प्रयास गरेको बताए । वातावरणका लागि नेपालजस्तो अनुकूल भू-भाग अरु देशले नछुट्याएको उनको भनाइ थियो । 

कार्यक्रममा एमालेका स्थायी कमिटी सदस्य गुरु बराल, पोलिटब्युरो सदस्य गोकुलप्रसाद बाँस्कोटा, एमाले जिल्लाध्यक्ष अशोक ब्याञ्जूलगायतले मानव जीवनका लागि प्रमुख आवश्यक प्रकृति बचाउँदै विकास गर्नुपर्ने धारणा व्यक्त गरे ।