दोहा– साउदीले गैरकानुनी कामदारमाथि धरपकड तीब्र पारेसँगै थप १३ हजार ९३९ जना आप्रवासी नागरिक पक्राउ परेका छन् । 

एक साताभित्र राज्यका विभिन्न क्षेत्रबाट रेसिडेन्सी, श्रम ऐन र सीमा सुरक्षा नियम उल्लंघन गर्ने १३ हजार ९३९ जना पक्राउ परेका हुन् ।

साउदीको गृह मन्त्रालयका अनुसार २७ जुलाई देखि ५ अगस्टसम्म एक साताको अवधिमा सुरक्षा बलका विभिन्न इकाइले राज्यभर गरेको संयुक्त फिल्ड अभियानका क्रममा उनीहरूलाई पक्राउ गरिएको हो ।

पक्राउ पर्नेमा रेसिडेन्सी प्रणाली उल्लङ्घन गर्ने ७ हजार ८ सय ९४, सीमा सुरक्षा नियम उल्लङ्घन गर्ने ३ हजार ८३९ र श्रम कानून उल्लंघन गर्ने २ हजार २०६ जना रहेका छन् ।

राज्यमा सीमा पार गर्न खोज्दा ९ सय ३३  जना व्यक्तिहरू पक्राउ परेका थिए । जसमा ४१ प्रतिशत यमनी, ५८ प्रतिशत इथियोपियाली र १ प्रतिशत अन्य देशका थिए । यस्तै ४४ उल्लङ्घनकारी साउदी अरेबियाबाट बाहिर जानका लागि सीमा पार गर्न खोज्दा पक्राउ परेका थिए।

यी मध्ये कानुन उल्लङ्घन गर्नेलाई ओसारपसार गर्ने र आश्रय दिने ८ जनालाई पनि सुरक्षा बलले पक्राउ गरेको मन्त्रालयलाई उद्धृत गर्दै साउदी गजेटले जनाएको छ। यी सबैलाई सजाय तथा कानुनी प्रक्रिया पूरा गरी देश निकाला गरिने जनाएको छ ।

घुसपैठ गर्ने, राज्य प्रवेशमा सहजीकरण गर्ने, ढुवानी, आश्रय दिने, कुनै सहयोग वा सेवा प्रदान गर्नेलाई १५ वर्षसम्म कैद र अधिकतम १० लाख साउदी रियाल जरिवानाको सजाय हुने त्यहाँको गृह मन्त्रालयले जनाएको छ ।

पछिल्लो समय साउदीले भिसाको म्याद सकिएर लुकिछिपी बस्ने आप्रवासीलाई लक्षित गरि धरपकड अभियान तीब्र पारेसँगै गैरकानुनी रुपमा त्यहाँ कार्यरत सयौँ नेपालीहरू पनि पक्राउ परेका र हाल उनीहरूलाई जेलमा राखिएको र जेल अवधि समाप्त गरेपछि आवश्यक कानुनी प्रक्रिया पूरा गरी डिपोर्ट गर्ने गरेको छ ।