काठमाडौँ : अर्थविद् कमलेश अग्रवालले अर्थतन्त्र धराशयी हुँदा निजी क्षेत्र ठूलो समस्यामा परेको बताएका छन् । खबरहबले आयोजना गरेको कार्यक्रममा बोल्दै चेम्बर अफ कमर्शका वरिष्ठ उपाध्यक्षसमेत रहेका अर्थविद् अग्रवालले निजी क्षेत्रको अवस्थाबारे सरकार जिम्मेवार हुनुपर्ने बताएका हुन् ।

अहिले बैंकको ब्याजदरले गर्दा निजी क्षेत्र ठूलो समस्यामा रहेको भन्दै त्यसको समाधानका लागि सरकार रमिते बन्नु दुःखद भएको उनले टिप्पणी गरे । उच्च बैंक ब्याजदरमा नेपाल विश्वकै पाँचौ देश रहेको भन्दै यसले निजी क्षेत्रलाई ठूलो संकट सिर्जना गरेको अग्रवालले बताए ।

अहिले रेमिट्यान्सले देश धानिरहेको अवस्था भएपनि त्यो भोलिका दिनमा दायाबाँया हुँदा झन् ठूलो संकट आउन सक्ने उनले चेतावनी दिए । उद्यमी व्यवसायीसँग पैँसा नभएको खण्डमा देशले कहिल्यै प्रगति गर्न नसक्ने पनि अग्रवालको भनाई छ ।

तर भूकम्प र कोभिड महामारीले गर्दा उद्यमी व्यवसायीसँग पुँजी नरहेको भन्दै त्यसको उत्थानका लागि सरकारले कुनै कदम चाल्न नसकेको उनको टिप्पणी छ । निजी क्षेत्र पलायन हुँदै गएमा नेपाल पनि श्रीलंका बन्न सक्नेतर्फ सचेत हुनुपर्ने अग्रवालको भनाई छ ।

सरकारले राष्ट्र बैंकमा पैँसा थन्क्याएर मात्रै नहुने भन्दै बजारमा पैँसा पठाउनुपर्ने आवश्यकता रहेको अग्रवालले बताए ।