तेल अभिभ- प्यालेस्टाइनी लडाकुको हमलामा परी मृत्यु भएका नेपाली नागरिकको शव फिर्ता ल्याउन एवम् फसेका नागरिकको उद्धार गर्न सरकारले इजरायलतर्फ जहाज पठाउने तयारी गरिरहेको बेला विभिन्न हवाई कम्पनीले त्यहाँबाट हुने सबै उडान र अवतरण स्थगित गरेका छन् ।

इजरायलस्थित तेल अभिभ सहरमा रहेको बेन गुरियोन अन्तर्राष्ट्रिय विमानस्थल पूर्ण रुपमा सुरक्षित नभएको भन्दै अमेरिकी हवाई सेवा कम्पनीहरु डेल्टा एयर, युनाइटेड एयरलाइन्स, अमेरिकन एयरलाइन्स र फ्रान्सको एयर फ्रान्स, फिनल्याण्डको फिन एअरले सबै उडान र अवतरण स्थगित गरेका हुन् ।

अन्तर्राष्ट्रिय समाचार संस्था रोयटर्सका अनुसार बेलायतको इजीजेट, चीनको हाइनान अयरलाइन्सले पनि हवाई सेवा स्थगित गरेको घोषणा गरेका छन् ।

हमास, प्यालेस्टाइनी इस्लामिक जिहादलगायतका प्यालेस्टाइनी लडाकु समूहले इजरायलमाथि हमला गरेसँगै सुरक्षा चिन्ताबीच विभिन्न एयरलाइन्सले हवाई सेवा स्थगित गरेका हुन् ।

सामाजिक सञ्जालमा सार्वजनिक भएका केही फुटेजहरुमा गाजा क्षेत्रमा रहेको लडाकुहरुले आकाशमा उडिरहेका हेलिकोप्टर तथा लडाकु विमानलाई लक्षित गरी काँधमा राखेर मार हान्न सक्ने विमानभेदी क्षेप्यास्त्र प्रहार गरिरहेको देखिन्छ ।

यसअघि हमासको लडाकु दस्ता इजाद्दिन अल कसम ब्रिगेडले बेन गुरियोन अन्तर्राष्ट्रिय विमानस्थलमा रकेट आक्रमण गरेको दाबी गरेको थियो ।