दोहा– प्यालेस्टाइनको हमास समूहको आक्रमणमा परी इजरायलमा ५७ सैनिक र ३४ प्रहरी अधिकारी मारिएको अधिकारीहरूले जनाएका छन् । 

इजरायल डिफेन्स फोर्सले आइतबार गाजापट्टीको सीमामा हमास आतङ्ककारीहरूसँगको लडाइँमा मारिएका ५७ सैनिकको नाम प्रकाशित गरेको छ।

यसैबीच, इजरायल पुलिसले आतङ्कवादीहरूको सामना गर्दा मारिएका ३४ अधिकारीहरूलाई सूचीबद्ध गरेको छ। गाजामा हमासका आतङ्ककारीहरूले इजरायलविरुद्ध युद्ध सुरु गर्दा, सहरहरूमा घुसपैठ गर्ने, सैन्य स्थानहरूमा आक्रमण गर्ने गरिरहेको जनाएको छ ।

यात्रुहरूलाई सडक र उनीहरूको घरहरूमा गोली हानेर र देशको विस्तृत क्षेत्रहरूमा हजारौँ रकेटहरू प्रहार गर्दा कम्तीमा तीन सय जनाको मृत्यु भएको थियो। 

आतङ्ककारीहरूले दर्जनौँ सैनिक र नागरिकहरूलाई गाजामा तानेर लगेको र त्यहाँ उनीहरूलाई बन्धक बनाइएको द टाइम्स अफ इजरायलले जनाएको छ ।

गाजामा बन्धक बनाएकाहरूको सङ्ख्यासँगै मारिएका सैनिकहरूको कुल सङ्ख्याबारे अधिकारीहरू अझै निश्चित छैनन्।

इजरायल प्यालेस्टाइनको हमास समूहको युद्धमा परी १० नेपाली सहित ६०० भन्दाबढी इजरायलीको मृत्यु भइसकेको छ भने एक सय भन्दा बढी व्यक्तिको अपहरण गरिएको बताइएको छ ।