श्रीनगर- भारतको जम्मु कश्मीरका किसान दूध उत्पादनतर्फ आकर्षित भएका छन् । पछिल्ला चार वर्षमा जम्मु कश्मीर प्रशासनले कृषि क्षेत्रको विकासमा ध्यान केन्द्रित गरेसँगै त्यहाँ दूधको उत्पादनमा पनि वृद्धि भएको भारतीय समाचार संस्था एएनआईले जनाएको छ ।

यस क्षेत्रलाई दूध एमव् दूग्धजन्य उत्पादनमा आत्मनिर्भर बनाउन विशेष योजना अघि सारिएको एएनआईले उल्लेख गरेको छ । पछिल्ला केही वर्षयता यस क्षेत्रका शिक्षित युवाहरु पनि पशुपालन व्यवसायतर्फ आकर्षित हुँदै गएका छन् ।

जम्मु कश्मीरको पुँछ, राजौरी, किस्तवर, रामवन, दोदाजस्ता स्थानका युवाहरुले ठूलो स्तरमा डेरी फार्मको स्थापना गरिरहेको जनाइएको छ । सरकारले पनि उनीहरुलाई मद्दत गरिरहेको एएनआईले जनाएको छ ।

सरकारी तथ्यांकलाई उद्धृत गर्दै एएनआईले जनाएअनुसार जम्मु कश्मीरमा गाईको सङ्ख्या ३२ लाख रहेको छ । जुन भारतको कूल गाईको सङ्ख्याको १ दशमलब शून्य ४ प्रतिशत रहेको बताइएको छ ।

पछिल्लो समय जम्मु कश्मीरको दूध तथा दूग्धजन्य उत्पादनको बजार ९० अर्ब ८० करोड भारतीय रुपैयाँ बराबर रहेको छ ।