काठमाडौँ– ललितपुरको बखुण्डोलमा निर्माणाधीन समिट अपार्टमेन्ट वरपरका घर भासिएका छन्।  निर्माणधीन अपार्टमेन्टका कारण ति घर भत्किएका र भासिएका स्थानीयले दाबी गरेका छन्।  

चौधरीको समिट अपार्टमेण्टको जग खन्ने क्रममा दुई वटा घर ध्वस्त भएको छन् । एउटा छ तले घरको भुइँतल्ला जमिनमुनि भासिएको छ भने आधा दर्जनबढी घरमा क्षति पुगेको जनाइएको छ ।

अपार्टमेन्ट निर्माणको क्रममा वरपरका घरहरू भासिएपछि भागदौड गर्ने क्रममा कतिपय मानिस घाइतेसमेत भएका छन्।  हिजो राति पीडित बनेका आधा दर्जन घरधनी र स्थानीय विरोधमा स्थानीयहरु उत्रिएका हुन् । विनोद चौधरीले गैरकानुनी ढंगले अपार्टमेन्ट बनाउन थालिएको स्थानीयहरुको आरोप छ ।

गैरकानुनी ढंगले अपार्टमेन्ट बनाएर आफ्नो निजी सम्पत्तिमा क्षति पुर्‍याउने काम गरेको भन्दै स्थानीयहरुले गुनासो गरेका छन् । ललितपुर महानगरले चौधरीको कम्पनीले नियमानुसारको निवेदन, प्रक्रिया र निर्माण स्वीकृति नलिई काम थालेको महानगरले जनाएको छ ।

आफ्नो मनमानी ढंगले विनोद चौधरीले अपार्टमेन्ट बनाउन थालेपछि महानगर कारबाही गर्न एक्सनमा उत्रिएको छ । आइतबार बिहान महानगरका प्रमुख चिरीबाबु महर्जनले चौधरीसँग यसबारे छलफल गरेका छन् । 

यसैबीच, ललितपुर क्षेत्र नम्बर ३ की सांसद डा. तोसिमा कार्कीले सो अपार्टमेन्ट बनाउने कम्पनी र लगानीकर्ताहरूले स्थानीयलाई उचित क्षतिपूर्ति दिनुपर्ने माग गरेकी छिन्।