काठमाडौँ- मुख्यमन्त्री राजेन्द्रसिंह रावलले विश्वासको मत लिने प्रयोजनका लागि आह्वान गरिएको सुदूरपश्चिम प्रदेशसभाको बैठक सुरु भएको छ ।

बैठकमा नागरिक उन्मुक्ति पार्टीका सांसदहरु भने उपस्थित भएका छैनन् । उक्त पार्टीले मुख्यमन्त्री रावललाई विश्वासको मत नदिने निर्णय गरेको छ ।

नागरिक उन्मुक्ति पार्टीले साथ नदिँदा मुख्यमन्त्री रावलले विश्वासको मत पाउन कठिन छ । प्रदेशसभामा एमालेका १०, माओवादी केन्द्रका (सभामुख बाहेक) १० र राप्रपाका १ गरी केवल २१ मत छ। जुन आवश्यक २७ मतभन्दा ६ कम हो । ७ मत रहेको नागरिक उन्मुक्ति पार्टी मुख्यमन्त्रीलाई विश्वासको मत प्राप्त गर्न निर्णायक देखिन्छ ।

पुस २७ गते मुख्यमन्त्री नियुक्त भएका रावलले माओवादी केन्द्र (११), एमाले (१०), नागरिक उन्मुक्ति पार्टी (७) र राप्रपा (१) को समर्थनसहित मुख्यमन्त्रीमा दाबी पेश गरेका थिए । दाबी पेश गर्दा उनलाई २९ सांसदको समर्थन थियो ।