इस्लामावाद- पछिल्लो समय पाकिस्तानमा अफगान आप्रवासीहरु पक्राउ पर्ने क्रम बढेको पाइएको छ । हालै पाकिस्तानको राजधानी इस्लामावादमा १७ जना अफगान आप्रवासी पक्राउ परेका छन् ।

पाकिस्तानमा रहेको अफगान आप्रवासी परिषदका अनुसार वैध राहदानी र भिसा भएपनि प्रहरीले उनीहरुलाई पक्राउ गरेको हो । उनीहरुलाई हिरासतमा राखिएको अफगानिस्तानको खामा प्रेसले जनाएको छ ।

अफगानिस्तानको शरणार्थी तथा पुनर्मिलन मन्त्रालयले सबै छिमेकी मुलुक विशेषगरी पाकिस्तानलाई यस विषयलाई राजनीतिकरण नगरी अन्तर्राष्ट्रिय कानूनबमोजिम मात्रै अफगान आप्रवासीसँग व्यवहार गर्न आह्वान गरेको छ ।

पाकिस्तानको कराँचीमा रहेको अफगान वाणिज्यदूतको कार्यालयका अनुसार पाकिस्तानमा २५ लाख अफगान आप्रवासीको बसोबास रहेको छ । यीमध्ये केबल ३ लाख वैध कागजातबिना पाकिस्तानमा बसिरहेका छन् ।