काठमाडौँ- युक्रेनकी प्रथम उपविदेशमन्त्री एमिने झापरोभाले आइतबार भारतको भ्रमण गर्ने भएकी छिन् । रुसले युक्रेनमाथि आक्रमण गरेपछि भारतको भ्रमण गर्ने उनी पहिलो युक्रेनी मन्त्री हुन् ।

भारत तेलका साथै सैन्य उपकरणका लागि रुससँग निर्भर रहँदै आएको छ । पछिल्लो समय भारत रुसमाथिको निर्भरताबाट उम्कन सकेको छैन । पश्चिमा मुलुकहरूबाट एक्लिएको रुससँगको सम्बन्धमा सन्तुलन मिलाउनु भारतका निम्ति चुनौतीपूर्ण रहेको विश्लेषण गरिएको छ ।

रुससँगको लामो समयदेखिको सुरक्षा सम्बन्धले भारतलाई जटिल कूटनीतक स्थितिमा पुर्‍याएको बताइन्छ । भारतले युक्रेन र रुसबीच जारी द्वन्द्व अन्त्य हुनुपर्ने बताएपनि रुसी आक्रमणको आजसम्म निन्दा गरेको छैन ।

नयाँ दिल्लीमा रहँदा उपविदेशमन्त्री झापरोभाले विदेश मन्त्रालयका वरिष्ठ अधिकारीसँग युक्रेनको वर्तमान अवस्थाका बारेमा विचार आदान प्रदान गर्ने भारतको विदेश मन्त्रालयले जारी गरेको विज्ञप्तिमा जनाइएको छ ।

युक्रेनसँगको भारतको मैत्रीपूर्ण सम्बन्ध तथा साझा चासोका विषयमा बहुपक्षीय एवम् द्विपक्षीय मञ्चहरूमा सहकार्य हुँदै आएको उल्लेख गर्दै विज्ञप्तिमा उपविदेशमन्त्रीको यो भ्रमण आपसी समझदारी र चासोका मामिलामा छलफल गर्न महत्वपूर्ण अवसर हुने बताइएको छ । उनले प्रधानमन्त्री नरेन्द्र मोदी वा सरकारका मन्त्रीहरूलाई भेट्नेबारेमा विज्ञप्तिमा केही उल्लेख गरिएको छैन ।

गत वर्ष भारतीय प्रधानमन्त्री मोदीले रुसी राष्ट्रपति भ्लादिमिर पुटिनलाई ‘यो युद्धको समय’ नभएको बताएका थिए । रुसको लामो समयदेखिको सहयोगी मानिने भारतले आगामी जुलाईमा आयोजना गर्ने साङ्घाई सहयोग सङ्गठनको शिखर सम्मेलनमा भाग लिने अपेक्षा गरिएको छ ।