काबुल- अफगानिस्तानमा शासन चलाइरहेको तालिबानले १७ लाख आप्रवासीलाई देश निकाला गर्ने पाकिस्तान सरकारको निर्णयको निन्दा गरेको छ । अफगानिस्तानको खामा प्रेसले जनाएअनुसार पाकिस्तान सरकारको निर्णयलाई ‘अमानवीय’ भन्दै तालिबानले निन्दा गरेको हो ।

पाकिस्तानले अफगान शरणार्थीहरुलाई लक्षित गर्दै मुलुकमा रहेका १७ लाख आप्रवासीलाई देश निकाला गर्ने निर्णय गरेको हो । पाकिस्तान सरकारले यस विषयको सम्बोधन गर्न नसके कठोर कदम चाल्न बाध्य हुनेसमेत तालिबानले चेतावनी दिएको छ ।

तालिबान प्रशासनका उपविदेशमन्त्री शिर मोहम्मद अब्बास स्टानिकजाईले विज्ञप्ति जारी गर्दै आप्रवासीलाई देश निकाला गर्ने कदम तत्काल बन्द गर्नसमेत पाकिस्तान सरकारसँग माग गरेका छन् ।

खामा प्रेसका अनुसार स्टानिकजाईले यस विषयलाई कूटनीतिक माध्यमबाट समाधान गर्नसमेत आफूहरु तयार रहेको जनाएका छन् ।