काठमाडौँ– नेपाल बार एसोसिएसनले शान्ति प्रक्रियालाई निष्कर्षमा पुर्‍याउन र पीडितलाई न्याय प्रदान गर्न नेपाल सरकार र गठित आयोग जिम्मेवार हुन आवश्यक रहेको बताएको छ। 

 मंगलबार एसोसिएसनका महासचिव अधिवक्ता अन्जिता खनाल र अध्यक्ष वरिष्ठ अधिवक्ता गोपालकृष्ण घिमिरेद्वारा जारी विज्ञप्तिमा सरकार र गठित आयोगहरू नै जिम्मेवार हुन आवश्यक रहेको बताइएको छ । 

त्यसैगरी यस विषयलाई लिएर विवाद सिर्जना हुनेगरि भ्रमपूर्ण अभिव्यक्तिहरू प्रकाशित भएको भन्दै ध्यानाकर्षण भएको पनि जनाएको छ। ती निकायहरूलाई प्रभावित हुनेगरि यस्ता गतिविधि नगर्न, नगराउन पनि एसोसिएसनले आग्रह गरेको छ। 

आजै प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ विरुद्ध सर्वोच्च अदालतमा रिट दायर भएको छ। अधिवक्ता ज्ञानेन्द्रराज आरण र रामेछापका कल्याण बुढाथोकीले द्वन्द्वकालीन मुद्दालाई लिएर मंगलबार बिहान सर्वोच्चमा प्रचण्डविरुद्ध रिट दायर गरेका हुन्।

गत शुक्रबार न्यायाधीश ईश्वर खतिवडा र हरिप्रसाद फुँयालको संयुक्त इजलासले प्रचण्डविरुद्ध अदालतमा मुद्दा दर्ता गर्न सर्वोच्च प्रशासनलाई आदेश दिएको थियो। प्रचण्डलाई पक्राउ गरी फौजदारी अभियोगमा छानबिन गरी कारवाही हुनुपर्ने आदेश माग गर्दै रिट परेको हो।