मनिला- फिलिपिन्सले चीनमाथि समुद्री सीमामा घुसपैठ गरेको आरोप लगाएको छ । फिलिपिन्सको परराष्ट्र मामिला मन्त्रालयले दक्षिण चीन सागरमा रहेको समुद्रमा चिनियाँ सैन्य पानीजहाज प्रवेश गरेको आरोप लगाएको हो ।

यसअघि चिनियाँ विदेश मन्त्रालयले पनि दक्षिण चीन सागरस्थित स्कारबोरो शोलनजिकै फिलिपिनी सैन्य पानीजहाजले ‘गैरकानूनी रुपमा प्रवेश’ गरेको आरोप लगाएको थियो ।

केही समयअघि स्कारबोरो शोल क्षेत्रनजिकै दुई मुलुकका सैन्य पानीजहाजहरु आमने सामने भएका थिए । दुबै मुलुकले यस क्षेत्रमा आफ्नो सार्वभौमिकता दाबी गर्दै आएका छन् । फिलिपिन्सले बाहो दे मासिन्लोक भनिने यस क्षेत्र आफ्नो आर्थिक क्षेत्रमा पार्ने बताउँदै आएको छ ।

यसअघि सन् २०१६ मा अन्तर्राष्ट्रिय अदालतले दक्षिण चीन सागरको ९० प्रतिशत आफ्नो सार्वभौमिकतामा पर्ने चिनियाँ दाबीलाई खारेज गरिदिएको थियो । चीनले भने अन्तर्राष्ट्रिय अदालतको उक्त फैसलाको बेवास्ता गर्दै आएको छ ।

फिलिपिनी परराष्ट्र मामिला मन्त्रालयले चिनियाँ सैन्य पानीजहाज उक्त क्षेत्रमा बिनाकारण प्रवेश गरेको भन्दै यसले तनाव बढाउने चेतावनी दिएको छ ।