इस्लामावाद- पछिल्लो समय पाकिस्तानमा हिन्दू, इसाई, सिखजस्ता धार्मिक अल्पसङ्ख्यकविरुद्ध दमन बढ्दै गएकोप्रति पाकिस्तानी सिख अगुवाहरुले चिन्ता व्यक्त गरेका छन् ।

पूर्व जेठेदार गियानी हरप्रित सिंहले यसबारे हालै विज्ञप्ति जारी गरेका छन् । विज्ञप्तिमा उनले लामो समयदेखि दमनमा रहेका सिख समुदायप्रति विभेद हट्न नसकेको भन्दै चिन्ता व्यक्त गरेका छन् ।

आफ्नो समुदायका मानिसहरु जबरजस्ती इस्लाम धर्मान्तरणको चपेटामा परेको भन्दै अल्पसङ्ख्यक समुदायको संरक्षण गर्न सरकारसमक्ष माग गरेका छन् ।

पाकिस्तानमा सिख समुदायका मानिसहरुको हत्या, उनीहरुको प्रार्थानास्थलमा तोडफोड, यातना, धर्मान्तरणजस्ता दमनको सिकार हुँदै आएका छन् ।

पाकिस्तानमा रहेका सिखसहित अन्य धार्मिक अल्पसङ्ख्यकविरुद्ध जारी दमनविरुद्ध अन्तर्राष्ट्रिय समुदायले आवाज उठाउनुपर्ने मानव अधिकारवादीहरुको भनाइ छ ।