बेइजिङ- सी चिनफिङको भ्रमणपछि नेपाल-चीन सम्बन्ध गतिशील भएको चिनियाँ परराष्ट्रमन्त्री छिन् काङले बताएका छन् । बिहीबार बेइजिङमा परराष्ट्रमन्त्री काङ र नेपाल–चीन कूटनीतिक परामर्श संयन्त्रको बैठकमा सहभागी हुन आएको नेपाली टोलीबीच भएको भेटवार्तामा उनले यस्तो बताएका हुन् । 

आज भएको भेटवार्तामा उनीहरूबीच दुई देशबीच लामो समयदेखि चल्दै आएको द्विपक्षीय सम्बन्ध र सहयोगलाई अझ सुदृढ बनाउने, भ्रमण आदान–प्रदान, विकास सहयोग, व्यापार, लगानी र पर्यटनलगायतका विषयमा छलफल भएको बेइजिङस्थित नेपाली दूतावासले जनाएको छ ।

उक्त अवसरमा चीनका लागि नेपाली राजदूत विष्णुपुकार श्रेष्ठ, मन्त्रालयका सहसचिव लोकबहादुर थापा, दुवै देशका परराष्ट्र मन्त्रालय र दूतावासका उच्च अधिकारीहरूको उपस्थिति थियो । परराष्ट्र सचिव पौडेल परराष्ट्र मन्त्रालयबीच द्विपक्षीय कूटनीतिक परामर्श संयन्त्रको बैठकमा सहभागी हुन नेपाली प्रतिनिधिमण्डलको नेतृत्व गर्दै बुधबार बेइजिङ पुगेका हुन् ।