काठमाडौँ– नेपाली कांग्रेसका सांसद गगन थापाले आममाफी दिएर अपराधीलाई रिहा गर्दा ठूलो आर्थिक चलखेल हुने गरेको बताएका छन् ।

प्रतिनिधिसभाको बिहीबारको बैठकको विशेष समयमा थापाले गम्भीर अपराधमा दोषी देखिएकालाई आममाफीका नाममा रिहाइ गर्दा ठूलो आर्थिक चलखेल हुने गरेको बताएका हुन् ।

उनले आममाफी दिने क्रममा केहीलाई कानूनी छिद्र खोजेर पनि उन्मुक्ति दिएको र गम्भीर अपराधमा दोषी ठहर भएकालाई कैद मिनाहा गरिएको उनको भनाइ छ । उनले कानून छिद्रमा टेकेर हुने यस्ता घटनालाई रोक्न कानूनलाई आवश्यकता अनुसार परिमार्जन गर्नुपर्नेमा जोड दिए । थापाले अहिलेको कानूनका कारण समस्या भएको भन्दै यसलाई सच्याउनुपर्ने र राष्ट्रपतिलाई बदनाम हुनुबाट रोक्नुपर्ने बताए ।

उनले कानून छिद्रमा टेकेर भएका गलत निर्णयका बारेका सरकारले सदनमा जवाफ दिनुपर्ने माग गरे ।