काठमाडौँ- आइतबार प्रतिनिधिसभाको बैठकमा नेकपा एमालेका अध्यक्ष तथा पूर्वप्रधानमन्त्री केपी शर्मा ओलीको टिप्पणीप्रति नेपाली कांग्रेस सांसद रामहरि खतिवडाले नियमापत्ति गरेका छन् ।

ओलीले प्रतिनिधिसभाको बैठकमा सम्बोधनका क्रममा कांग्रेस सत्तामा जान नपाएर पानीबाहिरको माछाजस्तो छटपटाएको टिप्पणी गरेका थिए । प्रतिनिधिसभाको आइतबार बसेको बैठकलाई सम्बोधन गर्दै अध्यक्ष ओलीले यस्तो टिप्पणी गरेका थिए ।

बैठकमा उनले राष्ट्रलाई अस्थिरताबाट जोगाउन नेकपा माओवादी केन्द्रका अध्यक्ष पुष्पकमल दाहाल प्रचण्ड नेतृत्वमा सरकार गठन गरेको समेत बताए ।

ओलीले बोल्ने क्रममा सरकारको न्यूनतम साझा कार्यक्रममा भएका विषय पनि उठाएका थिए । तर, ओलीले सम्बोधन गर्दै गर्दा कांग्रेस सांसद खतिवडाले भने संसदमा सरकारका न्यूनतम साझा कार्यक्रम संसदले देख्न नपाएको भन्दै आलोचना गरे ।

उनले भने, ‘न्यूनतम साझा कार्यक्रमको अनुहार रुप र कागज हामीले देख्न पाएका छैनौं । त्यसैले कुनै बार्दलीबाट ल्याएको कार्यक्रम संसदमा प्रस्तुत नगरियोस् ।’