नेपालगञ्ज- राष्ट्रिय प्रजातन्त्र पार्टी नेपालले आज नेपालगञ्जमा गर्ने भनिएको विरोधसभालाई श्रद्धाञ्जलीसभामा परिणत गरेको छ।

श्रद्धाञ्जलीसभामा बोल्दै पार्टी अध्यक्ष कमल थापाले भूकम्पग्रस्त क्षेत्र जाजरकोट र रुकुममा मन्त्री र नेताहरुको भिड देखेर उदेक र दिक्क लाग्ने बताएका छन् ।

तत्काल उद्धार र राहतमा ध्यान दिन पर्नेमा उल्टो सुरक्षा संयन्त्र नै अलमलमा पर्ने गरी नेताहरुको भिड लाग्नु अनावश्यक भएको टिप्पणी गर्दै थापाले अहिले सस्तो सहानुभूतिको राजनीति गर्ने समय नभएको समेत बताए ।

‘स्थानीय कार्यकर्ता परिचालन गरौँ, सरकारी संयन्त्र, सुरक्षा अङ्गलाई सहयोग गरौँ, सकिन्छ भने औषधि खाद्यान्न पठाइदिउँ, डिस्टर्ब हुने काम नगरौं,’ थापाले भने ।

कार्यक्रममा बोल्दै थापाले यथास्थितिबाट मुलुक अघि बढ्न नसक्ने बताए । भ्रष्टाचार, कुशासन, बेरोजगारी ,महङ्गीको अन्त्य आजको प्रमुख आवश्यकता भएको भन्दै यसको लागि अब जनआन्दोलनको विकल्प नभएको उनको भनाइ छ । कार्यक्रममा पार्टीका नेताहरु तारानाथ लुईटेल, राजाराम बर्तौला, रमेश अर्याल, हिक्मत ढकाल, लक्ष्मी हमाल, आशा विष्ट, दिपेन्द्रबहादुर सिंहलगायतले बोलेका थिए ।

कार्यक्रममा भूकम्पमा परी दिवङ्गत भएकाको आत्माको चीर शान्तिको कामना र घाइतेहरुको स्वास्थ लाभको कामना गर्दै एक मिनेट मौन धारण गरिएको थियो ।