काठमाडौँ- नेपाली कांग्रेसको युवा संगठन नेपाल तरुण दलले पार्टीकी केन्द्रीय सदस्य एवम् सांसद डा. आरजु देउवा राणाको सामाजिक प्रतिष्ठा, इज्जत र मानमर्यादामा आँच आउनेगरी सामाजिक सञ्जालमा सामग्रीहरु प्रसारण भएको भन्दै आपत्ति जनाएको छ । तरुण दलले विज्ञप्ति जारी गर्दै डा राणाविरुद्ध सुवास बोहोरा नामक टिकटक आईडीबाट झूठा र अनर्गल एवम् भ्रामक रुपमा विभिन्न पोस्टहरु प्रसारण भएको जनाएको छ ।

तरुण दलका अध्यक्ष विद्वान गुरुङद्वारा हस्ताक्षरित विज्ञप्तिमा भनिएको छ, ‘देशको कानुनको नै बर्खिलाफ हुनेगरी कलाकारहरुले कलाकारिताको मर्यादा र गरिमालाई नै आँच पुग्ने गरी सुवास बोहोरा भन्ने नामको टिकटक आईडीबाट माननीय सांसद आरजु राणा देउवाको गरिमा र इज्जतमा गम्भीर आँच पुग्ने खालको प्रकाशित सामग्रीप्रति आपत्ति प्रकट गर्दै नेपाल तरुण दल केन्द्रीय समिति त्यस प्रकारको व्यक्ति लक्षित भ्रामक कार्यको घोर भर्त्सना गर्दछ ।’

राजनीतिक पूर्वाग्रह राखी ‘घृणित र अवान्छित मनोवृत्तिका व्यक्ति वा समूहहरु’ ले उनीविरुद्ध यस्ता सामाग्री प्रसारित गरिएको तरुण दलको दाबी छ । तरुण दलले दोषीलाई कारवाही गर्न तीन दिनको अल्टिमेटमसमेत दिएको छ । नत्र तरुण दल आफैँ प्रतिकारमा उत्रने विज्ञप्तिमा चेतावनी दिइएको छ ।