ताप्लेजुङ– ताप्लेजुङको सिरिजङ्घा गाउँपालिकास्थित इलाका प्रहरी कार्यालय तेल्लोकमा कार्यरत वरिष्ठ प्रहरी हवल्दार दीपक शाह शंकर मृत अवस्थामा भेटिएका छन् ।

उदयपुरको त्रियुगा नगरपालिका–७ घर भएका शंकर सुरक्षा गस्तीका क्रममा ताप्लेजुङको सिदिङ्वा गाउँपालिकाबाट फर्किँदै गर्दा मृत अवस्थामा फेला परेको जिल्ला प्रहरी कार्यालय ताप्लेजुङले जनाएको छ ।

सिदिङ्वाको मेहेलेबाट फर्किने क्रममा प्रहरी कर्मचारीलाई म बिस्तारै आउँछु भनेको तर निकै बेर नआएपछि खोजी गर्दा मृत अवस्थामा भेटिएको जिल्ला प्रहरी कार्यालय ताप्लेजुङका प्रवक्ता तथा सूचना अधिकारी प्रहरी निरीक्षक कुशराम कार्कीले जानकारी दिए ।

प्रहरीका अनुसार अनुसार मृतक शङ्कर छारे रोगबाट पीडित थिए । प्रहरीले मृतकको शव परीक्षण गरी आफन्तलाई बुझाउने तयारी गरेको छ ।