चितवन – अति सङ्कटापन्न अवस्थामा रहेको घडियाल गोही संरक्षण गर्ने उद्देश्यले चितवनमा नेपाल गोही संरक्षण मेला २०८० आयोजना हुनेभएको छ ।

उक्त गोही मेला चितवनको पर्यटकीय क्षेत्र सौराहामा यही मङ्सिर २२ र २३ गते हुने भएको हो । गोही प्रजातिको प्रभावकारी संरक्षण स्थानीय समुदायको सहभागिता वैज्ञानिक सुचना र जानकारीका साथै समग्र गोही प्रजातिको दिगो संरक्षण रणनीति तयार र नयाँ पीढीमा संरक्षण संस्कृतिको विकास गर्नको लागि मेलाको आयोजना गरीएको संयोजक रञ्जना भट्टले बताइन् ।

केयर अफ नेचरको आयोजनामा २ दिनसम्म हुने गोही मेलामा गोही प्रजातिको सूचनामूलक श्रव्य दृश्य सामग्री पोस्टर चित्रकला तथा सुचना केन्द्रको अवलोकनका साथै स्थानीय कला संस्कृति खानाका परिकार लगायतका स्टल रहनेछन् ।

गोही मेलाले पर्यटकलाई आकर्षण गर्नुका साथै गोही प्रजाति संरक्षणमा मद्दत पुग्ने बागमारा मध्यवर्ती सामुदायिक वनका अध्यक्ष जितु तामाङले बताए ।

नेपालमा घडियाल र मगर २ प्रजाति गोही पाइने गरेको छ । यी गोहीको सङ्ख्या घट्दो क्रममा रहेको छ । नेपालमा घडियाल गोही २ सय ३९ वटा रहेको छ भने मगर गोही गणना हालसम्म भएको छैन ।