काठमाडौँ- ताइवानले अमेरिकासँग ४२ करोड अमेरिकी डलर बराबरका दुई सैन्य सम्झौतामा हस्ताक्षर गरेको छ । चीनसँगको तनाव उत्कर्षमा रहेका बेला ताइवानले आफ्नो मुलुकमा रहेका लडाकु विमानको मर्मतका लागि अमेरिकासँग ४२ करोड अमेरिकी डलर बराबरका दुई सम्झौता गरेको हो ।

भ्वाइस अफ अमेरिकाले जनाएअनुसार यसमध्ये ३२ करोड ३० लाख डलर सन् २०२८ को मार्च महिनासम्म विमानका पार्टपुर्जाको ठेक्काका लागि छुट्याइएको छ ।

त्यसैगरी, बाँकी रकम भने सन् २०२७ को जुन महिनासम्म हवाई सामग्री तथा अन्य पार्टपुर्जाका लागि छुट्याइएको छ ।

चीनले आफ्नो सार्वभौमिकता दाबी गर्दै आएको स्वशासित टापु ताइवानको हतियार आपूर्ति अमेरिकामा निर्भर रहँदै आएको छ ।

पछिल्लो समय चीनले ताइवानमाथि आक्रमण गर्नका लागि भन्दै सैन्य सतर्कतालाई उच्च बनाएसँगै ताइवानले अमेरिकासँग सुरक्षा सम्झौता गरेको हो ।