काठमाडौँ- अमेरिकाले श्रीलंकाका पूर्वनौसैनिक अधकिारी एवम् उत्तरपश्चिम प्रान्तका गभर्नर वसन्त करनानगोडामाथि प्रतिबन्ध लगाएको छ ।

तामिल टाइगर्सविरुद्धको युद्धका समयमा गम्भीर मानव अधिकार उल्लङ्घन गरेको आरोपमा अमेरिकाले उनी र उनकी पत्नी श्रीमाथी अशोक करनानगोडामाथि प्रतिबन्धको घोषणा गरेको हो ।

अमेरिकाको विदेश मन्त्रालयले विज्ञप्ति जारी गर्दै प्रतिबन्धको घोषणा गरेको हो । अमेरिकी विदेशमन्त्री एन्टोनी ब्लिन्केनले आफ्नो मुलुकले श्रीलंकामा भएको गृहयुद्धको सत्यतथ्य पत्ता लगाउन र पीडितलाई न्याय दिलाउन जारी राख्ने बताएका छन् ।

यता श्रीलंकाले भने अमेरिकी कदमको कडा निन्दा गरेको छ । श्रीलंकाले अमेरिकी कदमलाई ‘एकपक्षीय’ भन्दै दुई मुलुकबीच कायम सम्बन्धमा प्रतिकूल प्रभाव पार्ने चेतावनी दिएको छ । ७० वर्षे करनानगोडा सन् २००५ देखि सन् २००७ सम्म श्रीलंकाली नौसेनाका कमाण्डर थिए ।