महेन्द्रनगर- कञ्चनपुरको दोधारा चाँदनी नगरपालिकाले चालु आर्थिक वर्षमा नगर क्षेत्रका गरिब तथा विपन्न समुदायका लागि आवास निर्माण थालनी गरेको छ ।

नगरपालिकाले मेयर–उपमेयर आवास कार्यक्रमअन्तर्गत १९ घर निर्माण थालेको नगरपालिकाका प्रवक्ता ओम बस्नेतले जानकारी दिए । उनका अनुसार नगर क्षेत्रभित्र गत वर्ष पनि पूर्वसङ्घीय सांसद डा दीपकप्रकाश भट्ट र सुदूरपश्चिम प्रदेशसभा सदस्य पूर्वमन्त्री मानबहादुर सुनारको पहलमा समेत विपन्न समुदायका लागि दुईकोठे पक्की घर बनेका थिए ।

‘चालु आवमा नगरबाट १९ र हाम्रो वडाबाट विनियोजित बजेटले तीन घर निर्माणको अन्तिम चरणमा छन्’, वडा नं ६ का वडाध्यक्षसमेत रहेका प्रवक्ता बस्नेतले भने, ‘प्रदेशको जनता आवास कार्यक्रममार्फत पनि यहाँ विपन्न तथा गरिब समुदायलाई घर बनाइएको थियो ।’

यसअघि सङ्घीय सांसद भट्टले यहाँ घर निर्माणका लागि ५० लाख रुपैयाँ विनियोजन गरेको वडाध्यक्ष बस्नेतको भनाइ छ । चालु आवमा यहाँ १९ घर निर्माणका लागि ‘मेयर उपमेयर’ कार्यक्रममार्फत रु ४५ लाख बजेट विनियोजन गरिएको उनले जानकारी दिए ।

‘विपन्न समुदायले आवास नहुँदा वर्षात् र हावाहुरीका बेला निकै सास्ती खेप्नुपर्ने अवस्था आउँथ्यो’, उनले भने, ‘गरिब, विपन्न र दलितलगायत निम्न आयस्रोत भएकाको समस्या समाधानका लागि जनप्रतिनिधि सक्रिय छौँ ।’

उनले अझै पनि नगरभित्र विपन्न समुदायमा आवासको माग बढिरहेको जानकारी दिए । दोधारा चाँदनी–६ का वृद्ध जयलाल सुनार झोपडीबाट पक्की घरमा सरेपछि हर्षित छन् । ‘अवस्थाले पक्की घरमा बसौँला भन्ने सोचेको पनि थिएन’, सुनारले भने, ‘घर बनाइदिएकामा नगरपालिकाप्रति आभारी छु ।’

यसै गरी दोधारा चाँदनी–४ का जिया सुनार पक्की घर निर्माण गरिदिने खबरले खुसी छिन् । विपन्न समुदायलाई आवासका साथै आयमूलक काममा लाग्न मद्दत पुग्ने सीपमूलक तालिम पनि बस्तीमा सञ्चालन हुनुपर्नेमा सुनारको जोड थियो ।