काठमाडौँ- भारतका प्रधानमन्त्री नरेन्द्र मोदीले भूराजनीतिक तनाव अन्त्यका लागि जी २० का सदस्य राष्ट्रहरु एकताबद्ध हुनुपर्ने बताएका छन् ।

प्रधानमन्त्री मोदीले भारतमा आयोजित जी २० सदस्य राष्ट्रका विदेशमन्त्रीहरूको बैठकमा विद्यमान भूराजनीतिक तनाव समाधान गर्न सदस्य मुलुकहरू एकताबद्ध हुनुपर्ने बताएका हुन् ।

प्रधानमन्त्री मोदीले विकास, आर्थिक लचिलोपन, वित्तीय स्थायित्व, भ्रष्टाचार, आतङ्कवाद र खाद्य तथा ऊर्जा सुरक्षाका चुनौतीको सामना गर्न विश्वले जी २० लाई आशा र भरोसका साथ हेरेको उल्लेख गरे ।

उनले समूहको अध्यक्षका नाताले भारतले ‘एक विश्व, एक परिवार र एकै भविष्य’ समूहको आदर्श वाक्य चयन गरेको उल्लेख गर्दै यसको उद्देश्य एकता र साझेदारी भएको स्पष्ट पारे ।

उक्त वाक्यले साझा उद्देश्य प्राप्तिका लागि एकजुट हुने भावना झल्काउनेमा विश्वस्त रहेको प्रधानमन्त्री मोदीको भनाइ छ ।