काठमाडौँ- नगरिक उन्मुक्ति पार्टीका सांसद अरुणकुमार चौधरीलाई तत्काल रिहा गर्न माग गर्दै कैलालीमा प्रदर्शन भएको छ । बिहीबार पक्राउ परेका उनी शुक्रबार जेल चलान भएका हुन् ।

उनलाई तत्काल रिहा गर्न माग गर्दै उन्मुक्ति पार्टीले कैलालीमा प्रदर्शन गरेको हो । विरोध प्रदर्शनमा उत्रेका उन्मुक्ति पार्टीका नेता कार्यकर्ताले कैलालीका सडक अवरुद्ध पारेका छन् ।

२०६६ सालमा ट्याक्टरमा आगजनी गरेको मुद्दामा दोषी ठहर भएका उनलाई कैलाली जिल्ला अदालतले ६ महिना कैद र ८ लाख ७५ हजार रुपैयाँ जरिवानाको फैसला गरेको थियो ।

सोही फैसला कार्यान्वयनका लागि प्रहरीले उनलाई बिहीबार बाँके कोहलपुरबाट पक्राउ गरेको थियो । शुक्रबार बिहान उनलाई जिल्ला अदालत कैलालीमा उपस्थित गराइएको थियो । अदालतबाट कैदी पुर्जी बुझेर उनी जेल चलान भएका हुन् ।

उनी कैलाली–२ बाट प्रतिनिधिसभा सदस्यमा निर्वाचित भएका हुन् ।