काठमाडौँ- संयुक्त राष्ट्रसंघले मानवीय संकट गहिरिँदै गएको अवस्थामा अफगानिस्तान ‘प्रणालीगत पतन’ को जोखिममा रहेको जनाएको छ ।

अफगानिस्तानका नागरिकहरु भोकमरी, गरिबी, स्वच्छ खानेपानीको एवम् अत्यावश्यक वस्तुको अभावका कारण गम्भीर मानवीय विपदको अवस्थामा रहेको राष्ट्रसंघले उल्लेख गरेको छ ।

राष्ट्रसंघको मानवीय मामिला संयोजन कार्यालय ओसीएचएले प्रतिवेदन जारी गर्दै सन् २०२३ मा अफगानिस्तानका ६० लाख नागरिक गम्भीर खाद्य असुरक्षाको अवस्थामा बाँच्न बाध्य हुने र १ करोड ७० लाख मानिसहरु गम्भीर भोकमरीको जोखिममा धकेलिने जनाएको छ ।

अफगानिस्तानको टोलो न्युजका अनुसार अफगानिस्तानमा जारी मानवीय संकटले विगत २ दशकमा मुलुकले महिला अधिकारजस्ता क्षेत्रमा हासिल गरेको उपलब्धीलाई पनि खतरामा पारेको राष्ट्रसंघले जनाएको छ ।

घट्दो आयस्तर, खाद्यान्नमा उच्च मूल्यवृद्धि, बेरोजगारी र गिर्दो अर्थव्यवस्थाका कारण सन् २०२३ को पहिलो त्रैमासिकमा अफगानिस्तानको अवस्था अझ खराब बन्दै जाने प्रतिवेदनमा उल्लेख छ ।