लमजुङ– लमजुङको सदरमुकाम बेँसीसहर नगरपालिकाले कुकुर पाल्नका लागि नगरपालिकाबाट अनुमति लिन सर्वसाधारणलाई आग्रह गरेको छ ।

नगरपालिकाले एक सूचना जारी गर्दै निजी रूपले पालिएका कुकुरलाई नगरपालिकामा दर्ता गरी अनुमति लिन १५ दिने सार्वजनिक सूचना जारी गरेको हो ।

बेँसीसहर नगरपालिकाको क्षेत्रभित्र अत्याधिक रुपमा वेवारिसे तथा घरपालुवा कुकुरको संख्या वृद्धि भई फोहोर प्रदुषण र दुर्घटनासमेत बढेको भन्दै त्यसलाई व्यवस्थापन गर्न नगरपालिकाले सूचना जारी गरेको हो ।

विशेषगरी कुकुरले बजार क्षेत्र अन्तर्गतका सडक छेउमा रहेका घर तथा होटलहरुमा पसी खानेकुरा खाइदिने तथा घरभित्रै पसेर दिसापिसाब गरी फोहर बनाउने र सडक पेटी तथा नालीहरुमा जथाभावी रुपमा दिसापिसाब गरी फोहर भएको गुनासो आएसँगै त्यसलाई व्यवस्थापन गर्न नगरपालिका लागिपरेको सूचनामा उल्लेख गरिएको छ ।

नगरपालिकाले निजी रुपमा पालिएका कुकुरलाई जथाभावी रुपमा नछाड्न र सडक पेटी, छेउ, भित्ता तथा नालीहरुमा अव्यवस्थित तवरबाट दिसापिसाब गराउने कार्य बन्द तथा गराउन पनि सोही सूचनामार्फत आग्रह गरेको छ ।

नागरिकबाट गुनासो आएसँगै कुकुर व्यवस्थापनका निम्ति नगरपालिकाले १५ दिनको अवधि दिएर सार्वजनिक सूचना जारी गरेको हो ।

सो अवधि भित्र घरपालुवा कुकुर नगरपालिकामा दर्ता नगराएमा तथा अनुमति नलिएमा नियमानुसार जरिवाना तथा कारबाही प्रकृया अगाडि बढाइने नगरपालिकाले जनाएको छ ।