काठमाडौँ- गुण्डागर्दी गरेको आरोपमा प्रहरीले ५ जनालाई पक्राउ गरेको छ । काठमाडौँको बौद्ध जोरपाटीलगायतका स्थानमा सर्वसाधारणसँग अनावश्यक विवाद गरी डर, त्रास, भय सृजना गरेर गुण्डागर्दी गरेको आरोपमा प्रहरीले ५ जनालाई पक्राउ गरेको छ ।

पक्राउ पर्नेहरुमा रामेछाप गोकुलगंगा घर भई हाल काठमाडौँको जोरपाटी बस्ने २८ वर्षीय बाफ्ले भन्ने विक्की लामा, सिन्धुपाल्चोकको मेलम्ची घर भई हाल काठमाडौको गोकर्णेश्वर बस्ने ३४ वर्षका श्यामबहादुर लामा, सिन्धुपाल्चोकको मेलम्ची घर भई हाल काठमाडौँको कागेश्वरी मनहरा, डाँछी बस्ने ३६ वर्षीय भीमबहादुर बस्नेत छन् ।

त्यसैगरी, सोही आरोपमा प्रहरीले सिन्धुपाल्चोकको मेलम्ची घर भई हाल काठमाडौँको मूलपानी बस्ने ३५ वर्षीय गोविन्द गजमेर र सिन्धुपाल्चोकको चौतारा साँघाचोकगढी घर भई हाल काठमाडौँको गोकर्णेश्वर बस्ने ३५ वर्षीय प्रविण तामाङ रहेका छन् ।

उनीहरु समूहमा गई सर्वसाधारणलाई कुटपिट गर्ने, गैरकानुनी रूपमा रकम माग गर्नेलगायतका अपराधिक गतिविधिमामा संलग्न रहेका प्रहरीले जनाएको छ । पक्राउ परेका उनीहरुलाई मुलुकी अपराध संहिता २०७४ को दफा ११८ को अभद्र व्यवहार गर्न नहुने कसूरमा थप अनुसन्धानको लागि प्रहरी वृत्त बौद्ध पठाइएको छ ।