धादिङ – धादिङको गणेश खोलाको पुल नजिकको सडक बनाउन आज दिनभर लाग्ने भएको छ।

धादिङको थाक्रे गाउँपालिका र धुनिबेसी नगरपालिका जोड्ने पुलको मुखमा जमिन भासिएपछि सोमबार अपराह्न ४ बजेदेखि सडक अवरुद्ध भएको हो।

पुल मर्मत हुन नसक्दा १८ घण्टादेखि सवारी साधन रोकिएका छन् । सडक खुलाउन नेपाली सेना, प्रहरी, सशस्त्र प्रहरी, सडक प्राविधिक र मजदुर हिजैदेखि निरन्तर मर्मतमा लागिरहेका छन् । सामान्य फिलिङ गरेर नचल्ने भएपछि तलैदेखि जाली बिछ्याएर मर्मत भइरहेको छ।

मध्याह्न १२ बजे भन्दा अगाडी कम्तीमा एकतर्फी भए पनि बाटो खुलाउन सकिने गरी अहिले पनि काम भइरहेको जिल्ला प्रहरी कार्यालय धादिङका प्रहरी नायब उपरीक्षक सन्तु जैसवालले जानकारी दिए । ‘१२ बजेसम्म कम्तीमा एकतर्फी भए पनि खुलाउने गरी पुलको मर्मत भइरहेको छ’ उनले भने ।

गल्छी–नुवाकोट काठमाडौँ र हेटौडा हुँदै बाहिरिनका लागि त्रिभुवन राजमार्ग गरी दुई वटा वैकल्पिक बाटोबाट सवारी साधनलाई काठमाडौं भित्राउने र काठमाडौँबाट अन्यत्र पठाउने कार्य भने जारी छ । पुलनजिक सडक भासिएपछि पृथ्वी राजमार्ग  अवरुद्ध भएको हो ।