धनुषा– केही दिनदेखि बढेको गर्मीका कारण धनुषासहित तराई क्षेत्रको जनजीवन प्रभावित भएको छ । जेठको तेस्रो साता सुरु भइसक्दा पनि पानी नपरेपछि गर्मी अत्यधिक बढेको हो ।  

जनकपुरधामसहित तराई–मधेस क्षेत्रमा एक सातादेखि मध्याह्नको समयमा अधिकतम तापक्रम ३८ देखि ४१ डिग्री सेल्सियसको हाराहारीमा पुग्ने गरेको छ । चर्को घामका कारण दिउँसोको समयमा घर बाहिर निस्कन मुस्किल पर्ने गरेको स्थानीयले बताएका छन् ।

गर्मी बढेपछि मुख्य बजारका सडक सुनसान हुन थालेका छन् भने सरकारी कार्यालयमा सेवाग्राहीको सङ्ख्या पनि घटेको छ । यस्तै, विद्यालय, उद्योग व्यवसाय समेत प्रभावित भएका छन् । 

यसैबीच अस्पताल तथा स्वास्थ्य संस्थाहरूमा गर्मीका कारण घाउ, खटिरा, आउँ, टाइफाइड ज्वरो, झाडापखालालगायत सरुवा रोगका बिरामीको चाप बढ्न थालेको चिकित्सकको भनाइ छ । प्रादेशिक अस्पताल जनकपुरधामका प्रवक्ता डा. केडी दासका अनुसार अहिले दैनिक भाइरल ज्वरो, टाइफाइड, निमोनियाका बिरामी बढेका छन् । पसिना अत्यधिक आउने र पर्याप्त पानी सेवन नगर्दा डिहाइड्रेसनका बिरामी बढेको डा. दासको भनाइ छ । 

उनले गर्मी बढेसँगै लू को जोखिम बढेको बताए । दिउँसोको समयमा तापक्रम उच्च भएका बेला चल्ने तातो हावाले दैनिक ज्यालादारी तथा कडा श्रम गर्ने व्यक्तिलाई लू लाग्ने जोखिम बढेको उनको भनाइ छ । 

बढ्दो गर्मीबाट जोगिन फलफूलको जुस, पानीलगायतका तरल पदार्थको सेवन गर्नुका साथै दिउँसोको समयमा घरबाहिर ननिस्कन सर्वसाधारणलाई उनको सुझाव छ ।