काठमाडौँ – साविकको विजेता एसी मिलान इटालियन सिरी ए अन्तर्गत आइतबार राति टोरिनोसँग २-१ को अप्रत्यासित हार बेहोर्न पुगेको छ। यस हारसँगै मिलानले शीर्ष स्थानको नेपोलीसँगको अंकदुरी कम गर्ने अवसर गुमाएको हो।

खेलमा सुरुआती अग्रता टोरिनोले नै लियो। ३५औं मिनेटमा कोफी डिजीडिजीको गोलमा टोरिनोले अग्रता लियो। त्यसको दुई मिनेटपछि नै एलेक्से मिरानचुकले टोरिनोको अग्रता दोब्बर पारेका थिए।

६७औं मिनेटमा जुनियर मेसियासले गोल गर्दै मिलानलाई खेलमा फर्काउने प्रयास गरेका थिए। तर, त्यसपछि कुनै गोल सम्भव भएनन्।

यससँगै मिलानको १७ खेलको अपराजित यात्रामा पूर्णविराम लागेको छ। यसक्रममा मिलानले १२ खेल जितेको थियो भने पाँच खेल बराबरीमा टुङ्गाएको थियो।

मिलान १२ खेलमा २६ अंकसहित तेस्रो स्थानमा छ। जुन शीर्ष स्थानको नेपोलीभन्दा ६ र दोस्रो स्थानको एट्लान्टाभन्दा एक अंकले कम हो।