दोहा – कतारमा आगामी २० नोभेम्बरमा सुरु हुने फिफा विश्वकप २०२२ को टिकट बुक गरेका अन्तर्राष्ट्रिय फ्यानहरूले इमेलमार्फत कतार प्रवेश अनुमति प्राप्त गर्न थालेका छन्।

कतारले मंगलबार अर्थात् नोभेम्बर १, २०२२ देखि हय्या अनुमतिका सबै धारकहरूको लागि कतार प्रवेश खुल्ला गरेको छ । एफो साइज अनुमतिमा नाम, राष्ट्रियता, हय्या कार्ड नम्बरबाट अन्तिम प्रविष्टि मितिको अतिरिक्त क्युआर कोडसहित प्रवेश गर्नेको फोटो समावेश गरिएको जनाएको छ।

चार भागमा फोल्ड गर्न मिल्ने, प्रवेश अनुमति कतारमा फ्यान अनुभवको आनन्द लिनको लागि डिजिटल गेटवे हो। अनुमतिमा उल्लेख गरिए अनुसार प्रवेश अनुमति एफो कागजमा पूर्ण राम्रो गुणस्तरको प्रिन्टआउटको रूपमा मान्य र स्क्यानिङ उद्देश्यका लागि आवश्यक रहेको जनाएको छ ।

विश्वकपलाई मध्यनजर गर्दै कतारले आगामी मंगलबारदेखि कतार प्रवेश गर्न सबैका लागि कोरोना परीक्षण रिपोर्ट नचाहिने र यहाँ आइसकेपछि पनि र्‍यापीड एन्टिजेन परीक्षण गर्न नपर्ने जनाएको छ ।

फिफा विश्वकपमा ६४ खेलहरू हुनेछ भने नोभेम्बर २० मा कतार र इक्वेडरबीचको पहिलो खेल हुनेछ । कतारको राष्ट्रिय दिवसको दिन डिसेम्बर १८ मा लुसेल स्टेडियममा विश्वकपको फाइनल खेल हुनेछ । आयोजकहरूले प्रतियोगिताको लागि विश्वभरबाट २० लाख बढी दर्शकहरूले कतार भ्रमण गर्ने अपेक्षा गरेका छन् ।