काठमाडौँ- साउथ इन्डियन एक्टर जुनिएर एन्टीआर पछिल्लो समय चर्चामा छन् । उनले अभिनय गरेको फिल्म ‘आरआरआर’ ले विश्वभर दर्शकको माया पाइरहेको छ । फिल्मले राम्रो रेस्पोन्स पाएसँगै त्यसको प्रभाव बक्स अफिसमा देखिएको छ । फिल्मले विश्वभर सात सय करोड बढीको कलेक्सन गरिसकेको छ । एन्टीआरले फिल्ममा हिन्दी भाषामा पनि आफैँ डबिङ गरेका छन् । उनले आफ्नो पात्रलाई अन्य भाषामा पनि जीवन्त बनाएको चर्चा चलीनै रहेको छ । यसबीच उनले हिन्दी भाषाको फिल्म गर्ने मनसाय व्यक्त गरेका छन् ।

‘मलाई पूर्ण रुपको हिन्दी भाषाको फिल्म गर्न मन छ । किनकी मेरो लागि भाषा कहिले अवरोध बन्दैन’ उनले भने । एन्टीआरले निर्देशक एसएस राजामौलीले आफूलाई भाषामा नभई इमोसनमा काम गर्न सुझाएको समेत बताए । ‘भाषाले तिमीलाई फरक पार्दैन । किनकी इमोसन जहाँ पनि एकै हुन्छ । त्यसैले भाषालाई इस्यु नबनाउ । मलाई राजामौलीले भनेका छन्’ एन्टीआरले भने । उनले अनुपम चोपडासँग अन्तर्वार्ताको क्रममा आफूलाई बलिउडका दुई निर्देशकसँग काम गर्ने इच्छा रहेको समेत बताएका छन् ।

उनले राजकुमार हिरानी र संजय लीला भन्सालीसँग काम गर्ने इच्छा जाहेर गरेका हुन् । ‘मलाई राजकुमारजीको कथा वस्तु निकै मन पर्छ । उहाँले कथा र पात्रलाई दर्शकसँग भावनात्मक रुपमा जोड्नु हुन्छ । त्यसैले म उहाँको काम देखि निकै प्रभावित छु’ उनले भने । यस्तै , भन्सालीको भव्य सेट, कथावस्तु चयनले उनलाई प्रभावित बनाएको छ । ‘भन्सालीले छनौट गर्ने विषय र काल्पनिक संसारमा दर्शकलाई जोड्ने कलाको म फ्यान हुँ’ एन्टीआरले अन्तर्वार्ताको क्रममा भने । अब हेरौँ साउथका यी स्टारको इच्छामा बलिउडका दुई धुरन्धर निर्देशक हिरानी र भन्सालीले कस्तो प्रतिक्रिया जनाउँछन् ।