काठमाडौँ– पाकिस्तानमा गरिबीको दर बढेर ३५.७ प्रतिशत पुगेको छ । पाकिस्तानको इन्तेखाब दैनिकले जनाएअनुसार मुलुकमा खाद्यान्नको मूल्य बढेसँगै गरिबीको दर पनि बढेको हो ।

इन्तेखाबका अनुसार पाकिस्तानमा खानेकुराको मूल्य पनि २० देखि ३१ प्रतिशतले बढेको छ । अन्तर्राष्ट्रिय गरिबी सूचकांकमा पाकिस्तान ११६ मुलुकमध्ये ९२ औँ स्थानमा रहेको छ ।

इन्तेखाबको समाचारमा जनाइएअनुसार सरोकारवालाले मुलुकमा मुद्रास्फीति नियन्त्रण गर्नका लागि प्रभावकारी संयन्त्र बनाउन पाकिस्तान सरकारलाई सल्लाह दिएका छन् ।

मुद्रास्फीतिका कारण खाद्य सुरक्षामा नै नकारात्मक असर परेको भन्दै यस्तो सल्लाह दिइएको हो ।

पाकिस्तानमा आतंककारी गतिविधि, अफगानिस्तानमा जारी द्वन्द्व तथा मौसम परिवर्तनका कारण उसैपनि उच्च खाद्य असुरक्षा रहेको बताइएको छ । मुद्रास्फीतिले खाद्य सुरक्षामा झनै नकारात्मक असर पुगेको समाचारमा उल्लेख गरिएको छ ।