अर्घाखाँची – अर्घाखाँचीको भुमिकास्थान नगरपालिकामा ६ सय ३३ जनाले अपाङ्गता परिचयपत्र प्राप्त गरेका छन्। अपाङ्गता भएकालाई नगरपालिकाको महिला, बालबालिका तथा ज्येष्ठ नागरिक शाखाले अपाङ्गता परिचयपत्र वितरण गरेको हो।

परिचयपत्र प्राप्त गरेका ३२ पुरुष र २१ महिला गरी ५३ मध्ये चार जनाले ‘क’ वर्गको परिचयपत्र पाएका छन्। ३८ जनाले ‘ख’ वर्गको, पाँच जनाले ‘ग वर्गको र ६ जनाले ‘घ’ वर्गको परिचयपत्र प्राप्त गरेका छन्।

उपमेयर बालकृष्ण बन्जाडेले अशक्त अपाङ्ग भुमिकास्थान–३ का दिपक बन्जाडे र नरहरी पौडेललाई ‘क’ वर्गको रातो कार्ड (परिचयपत्र) वितरण गर्दै कार्यक्रमको उद्घाटन गरेका हुन्।

वडाले गरेको सिफारिस तथा अन्य अपाङ्गता खुल्ने कागजात र नागरिकको प्रत्यक्ष उपस्थितिमा परिचयपत्र वितरण गरिएको महिला, बालबालिका तथा ज्येष्ठ नागरिक शाखा प्रमुख शान्ता आचार्यले जानकारी दिइन्।