काठमाडौँ– घरेलु बजारमा घट्दो माग, खस्किँदो निर्यात र अमेरिकी प्रतिबन्धका कारण केही समयअघिसम्म उदीयमान रहेको चीनको कपडा उद्योग अहिले भने समस्यामा परेको पाइएको छ ।

फाइनान्सियल पोस्टका अनुसार सन् २०२० यता कपडाको माग खस्किँदै गएको छ । सन् २०२२ मा मात्रै अघिल्लो वर्षको तुलनामा ४० प्रतिशतले माग घटेको जनाइएको छ ।

चीनलाई विश्वकै सबैभन्दा ठूलो कपडा उत्पादक मानिन्छ । यस उद्योगले चीनको कूल ग्राहस्थ उत्पादनको ७ प्रतिशत हिस्सा ओगटेको छ ।

यसअघि अमेरिकाले चिनियाँ कारखानाहरुले सिन्जियाङ प्रान्तमा बसोबास गर्ने अल्पसङ्ख्यक उइगुर मुसलमानहरुलाई जबरजस्ती श्रममा लगाएको भन्दै चीनबाट कपासको आयातमा प्रतिबन्ध लगाएको थियो । यसकारण सिन्जियाङमा ३० लाख टनभन्दा धेरै कपास बिक्री हुन नसकेको जनाइएको छ ।

चीनको कपडा उद्योग धराशायी भएसँगै यसको विकल्पमा रहेका अन्य एसियाली मुलुकमा भने कपडा उद्योग फस्टाएको भारतीय समाचार संस्था एएनआईले जनाएको छ । भारत, भियतनाम, बंगलादेशजस्ता मुलुकमा विदेशबाट कपडाको माग बढ्दै जान थालेको जनाइएको छ ।