काठमाडौँ – यसै साता मात्र एकता राष्ट्रिय अभियान पार्टीको घोषणा गरेका बामदेव गौतमले नेकपा एमालेका अध्यक्ष केपी शर्मा ‌‌ओलीलाई भेटेका छन् ।

ओलीलाई भेट्न गौतम आज बिहान बालकोटस्थित ओली निवास पुगेका एकता राष्ट्रिय अभियानका प्रचार विभाग प्रमुख निमकान्त पाण्डेले जानकारी दिए ।

गौतम-ओली भेटमा वाम एकीकरण, एकीकरण नभए चुनावी मोर्चा निर्माण गर्नेलगायतका विषयमा छलफल भएको बताइएको छ। ओलीसँगै अन्य कम्युनिस्ट पार्टीका नेताहरुलाई भेटेर एकता वा चुनावी मोर्चाका लागि प्रयास गर्ने गौतमले बताइरहेका छन् ।

नयाँ दल घोषणा गर्दै गौतमले ३ महिनासम्म एकताका लागि प्रयास गर्ने र एकता प्रयास सफल नभए नयाँ दल दर्ताको प्रक्रियामा जाने बताएका थिए ।

अभियान अन्तर्गत नै गौतमले मंगलबार नेपाल कम्युनिष्ट पार्टी एकता राष्ट्रिय अभियान घोषणा गरेका थिए ।