काठमाडौँ- अमेरिकी तल्लो सदन हाउस अफ रिप्रिजेन्टेटिभकी सभामुख न्यान्सी पेलोसीका पति पाउल पेलोसी पक्राउ परेका छन् । मदिरा पिएर  गाडी चलाएको आरोपमा उनी पक्राउ परेको क्यालिफोर्निया राज्यको नापा काउन्टी क्रिमिनल जस्टिस नेटवर्कको पब्लिक बुकिङ रिपोर्टमा उल्लेख छ । 

पाउल नापा काउन्टीबाट शनिबार मध्यरातमा पक्राउ परेको अन्तर्राष्ट्रिय समाचार संस्था रोयटर्सले जनाएको छ । केही घन्टापछि उनलाई जेल चलान गरिएको थियो ।

उनलाई दुईवटा मुद्दामा जेल पठाइएको जनाइएको छ । उनको रगतमा शून्य दशमलब शून्य ८ प्रतिशत अल्कोहल भेटिएको थियो ।

पब्लिक बुकिङ रिपोर्टका अनुसार पाउल पेलोसी पाँच हजार डलरमा जमानतमा आइतबार बिहान रिहा भएका थिए । पाउलका विषयमा सभामुख पेलोसीले कुनै टिप्पणी गरेकी छैनन् ।

सान फ्रान्सिस्को निवासी ८२ वर्षीय पाउल पेलोसीले सन् १९६३ मा न्यान्सी पेलोसीसँग विवाह गरेका छन् । उनीहरूका पाँच सन्तान छन् ।