काठमाडौँ- अभिनेता सलमान खानको अभिनय रहेको फिल्म तेरे नामको चर्चा धेरै नै हुने गर्छ । फिल्मको गीतसंगीतलाई त दर्शकले रुचाएका नै थिए साथै सलमानको हेयर स्टाइल समेत निकै फेमस भएको थियो । फिल्ममा सलमानले निर्वाह गरेको राधेको भूमिका निकै लोकप्रिय भएको थियो l

सन् २००३ मा रिलिज भएको ‘तेरे नाम’ मा सलमानले निर्वाह गरेको राधे मोहनको भूमिकालाई दर्शकले निकै रुचाए । सतीश कौशिकको निर्देशनमा बनेको फिल्ममा सलमानकाे जोडी भूमिका चावलासँग बाँधिएकाे थियाे । सन् १९९९ मा आएको साउथ फिल्म ‘सेतु’ को रिमेक रहेको फिल्मबाट सलमान आफैँ आफ्नो भूमिकामा सन्तुष्ट थिएनन् ।

निर्देशक कौशिकले भारतीय मिडियासँग सलमानले पहिला नै आफ्नो भूमिकामा सन्तुष्टी नजनाएको बताए । ‘सलमानलाई त्यो भूमिका मन परेको थिएन । त्यसैले पनि यसको सिक्वेलको कुराकानी अगाडी बढेको छैन । केहि आइडिया आएका थिए तर यतिबेला दर्शकको टेस्ट बद्लिएको छ । त्यसैले ब्राण्ड बनिसकेको तेरे नामलाई लिएर सस्तो फिल्म बनाउने योजना छैन’ निर्देशक कौशिकले भने ।

बलिउड लाइफको रिपोर्ट अनुसार कौशिकले सलमानसँग त्यहिँ किसिमको भूमिका र जिवन्त अभिनय निकाल्न गाह्रो समेत बताएका छन् । ‘तेरे नामकै कथालाई नयाँ रुप दिएको फिल्म हो कबिर सिंह । त्यसैले पनि अब त्यहि कथामा सिक्वेल बनाउने योजना छैन’ उनले भने । यद्यपि यसबारेमा सलमानसँग सल्लाह गर्न भने बाँकी रहेको निर्देशक कौशिकले बताएका छन् । उनले तेरे नाम सिक्वेलको लागि सलमानलाई केहि समय अगाडी अप्रोच पनि गरे तर सलमानले मानेनन् ।