काठमाडौँ– पाँच दिने भ्रमणका लागि नेपाल आएको भारतीय सेना टोलीले प्रधानमन्त्री शेरबहादुर देउवासँग भेटवार्ता गरेको छ । उक्त टोलीले सोमबार रक्षामन्त्रीसमेत रहेका प्रधानमन्त्री देउवासँग प्रधानमन्त्री निवास बालुवाटारमा भेट गरेको हो।

नयाँ दिल्लीस्थित राष्ट्रिय रक्षा कलेजमा सञ्चालित ‘राष्ट्रिय रक्षा पाठ्यक्रम–६२’मा सहभागी शिक्षार्थीहरूसहितको ३१ सदस्यीय भ्रमणदल आइतबार नेपाल आएको थियो ।भ्रमण दलले सोमबार नै अर्थमन्त्री जनार्दन शर्मासँग पनि अर्थ मन्त्रालयमा भेटवार्ता गरेको छ।

प्रधानमन्त्री र अर्थमन्त्रीसँगको भेटअघि भ्रमणदलले सैनिक मुख्यालय जंगी अड्डाको भ्रमण गरेको थियो। सो क्रममा भ्रमणदलले प्रधानसेनापति प्रभुराम शर्मासँग भेट गरेको छ। भ्रमणको क्रममा भ्रमणदलका सदस्यहरू नेपाली सेनासँग सम्बन्धित विषयहरूमा आधारित प्रस्तुतीकरण तथा अन्तरक्रियात्मक कार्यक्रममा सहभागी भए ।

साथै उनीहरूले प्रधानसेनापति प्रभुराम शर्मासँग जंगी अड्डामा भेटवार्तासमेत गरे । भेटमा दुई देशका सैनिकबीचको सहकार्य र हितका विषयमा छलफल भएको सैनिक मुख्यालयले जनाएको छ।

भम्रण दलको नेतृत्व एयर भाइस मार्शल तेजवीर सिंहले गरेका छन्। भ्रमणदलमा भारत, भुटान, बंगलादेश, भियतनाम, साउदी अरब र अमेरिकाका अधिकारीहरू रहेका छन् ।

उनीहरूले परराष्ट्रमन्त्री डा. नारायण खड्कासँग पनि भेटवार्ता गर्ने कार्यक्रम छ। यस्तै मंगलबार पोखरास्थित मध्य कमाण्ड हेडक्वार्टरको भ्रमण गर्ने कार्यक्रम छ।