काठमाडौँ– जेठ १५ गते अर्थात नेपालमा गणतन्त्र स्थापना भएको दिन, आइतबार विषेश कार्यक्रम गरि मनाइएको छ । 

काठमाडौंको टुँडिखेलस्थित सैनिक मञ्चमा १५ औं गणतन्त्र दिवसको अवसरमा विशेष समारोह आयोजना गरिएको हो । समारोहमा राष्ट्रपति विद्यादेवी भण्डारी, उपराष्ट्रपति नन्दबहादुर पुन, प्रधानमन्त्री शेरबहादुर देउवा, कायम मुकायम प्रधानन्याधीश दिपककुमार कार्की, प्रतिनिधिसभाका सभामुख अग्निप्रसाद सापकोटा र राष्ट्रिय सभाका अध्यक्ष गणेश तिमिल्सिना लगायतको उपस्थिति रहको थियो भने नेपाली सेनाको हेलिकप्टरबाट पुष्पवृष्टि समेत गरिएको छ । त्यस्तै शान्तिका प्रतीक परेवा पनि उडाइएको छ । 

कार्यक्रममा नेपाली सेना, नेपाल प्रहरी र सशस्त्र प्रहरी बलका टुकडीले मार्च पास गरेका थिए । कार्यक्रमलाई सम्बोधन गर्दै प्रधानमन्त्री देउवाले यसैवर्ष प्रतिनिधिसभा र राष्ट्रियसभाको चुनावसमेत सफलताका साथ सम्पन्न गरी मुलुकमा जनउत्तरदायी गणतन्त्रात्मक शासन व्यवस्थालाई थप सुदृढ गर्न सरकार प्रतिबद्ध रहेको बताए । त्यस्तै उनले समृद्ध मुलुक निर्माणका लागि सबै राजनीतिक दल र नेपाली जनताबीच एकता र सहकार्य हुनु जरुरी रहेको धारणा पनि राखेका थिए । प्रधानमन्त्री देउवाले मुलुकमा राजनीतिक स्थिरता कायम भई देश आर्थिक समृद्धिको यात्रा अघि बढेको बताए ।

नेपालमा बिक्रम सम्मत २०६५ जेठ १५ गते निरंकुश राजतन्त्रको विधिवत् अन्त्य गर्दै सङ्घीय लोकतान्त्रिक गणतन्त्रात्मक शासन व्यवस्था प्रारम्भको घोषणा भएको थियो । त्यही दिनको सम्झनामा हरेक वर्ष जेठ १५ गते गणतन्त्र दिवस मनाउने गरिन्छ ।