काठमाडौँ – तारा एयरलाइन्सको सम्पर्कविहीन जहाज खोज्न नेपाली सेनाको एमआई ५७ हेलिकप्टर काठमाडौंबाट पठाइएको छ।

उद्धार टोली लिएर सेनाको हेलिकप्टर मुस्ताङको लेतेका लागि उडेको र सेनाको अर्को रेस्क्यू टोली मुस्ताङको घाँसाबाट घटनास्थलमा गएको नेपाली सेनाका प्रवक्ता सैनिक सहायक रथी नारायण सिलवालले जानकारी दिए।

मुस्ताङको घाँसा क्षेत्रमा ठुलो आवाजमा विस्फोट भएको र आगो देखिएको भन्दै स्थानीयले प्रहरीलाई सूचना दिएपछि उद्धार टोली मुस्ताङको घाँसा केन्द्रित छ।

बिहान ९ बजेर ५५ मिनेटमा पोखराबाट जोमसोमका लागि उडान भरेको जहाज १२ मिनेटमै सम्पर्कविहीन भएको पोखरा विमानस्थलले जनाएको छ।

विमान १० बजेर ७ मिनेट जाँदा अन्तिम सम्पर्कमा आएको थियो। मुस्ताङको एयरस्पेसमा पुगेपछि विमान सम्पर्कविहीन भएको थियो।

केहीबेरमा नागरिक उड्डयन प्राधिकरणले काठमाडौंमा पत्रकार सम्मेलन गरी घटनाबारे थप जानकारी दिने बताएको छ ।