काठमाडौँ- दक्षिणपूर्वी एसियाली मुलुक फिलिपिन्समा आएको बाढीका कारण ४२ जनाको मृत्यु भएको छ । अन्तर्राष्ट्रिय समाचार संस्था रोयटर्सका अनुसार भीषण वर्षासँगै आएको बाढीमा परी ४२ जनाको मृत्यु भएको हो ।

दक्षिणी फिलिपिन्सको मागुइन्डानाओ प्रान्तका धेरै सहरहरू बिहीबार रातभरि परेको भीषण वर्षाका कारण प्रभावित भएका छन् ।

फिलिपिन्सको बङ्सामोरो अटोनोमस रिजन इन मिन्डानाओ (बीएआरएमएम) नामक स्वशासित क्षेत्रका आन्तरिक मन्त्री नागुइब सिनारिम्बोलाई उद्धृत गर्दै रोयटर्सले जनाएअनुसार नाल्गे नामक आँधीले सो क्षेत्रमा भीषण वर्षा गराएको हो ।

सो क्षेत्रका दातु ओडिन क्षेत्रमा अझै केही मानिसहरु बेपत्ता रहेका कारण खोजी कार्यलाई निरन्तरता दिइने उनले बताए ।

यद्यपि खराब मौसमका कारण हाल भने उद्धार एवम् खोजी कार्य स्थगित गरिएको र शनिबार सबेरैबाट थालिने बताइएको छ ।