लमजुङ-  लमजुङको दोर्दी करीडोरमा निर्माण सम्पन्न भएको र निर्माणाधीन अवस्थामा रहेका जलविद्युत आयोजनाको विद्युत् राष्ट्रिय ग्रिडमा जोडिने बाटो खुलेको छ ।

मर्स्याङ्दी कोरिडोर २२० केभी प्रसारण लाइन आयोजना अन्तर्गतको उदिपुर-भरतपुर खण्डको उदिपुर सबस्टेसन देखि मर्स्याङ्दी जलविद्युत केन्द्रको स्विचयार्डसम्मको करिब ७ किमी २२० केभी लाइन वैकल्पिक व्यवस्थाअन्तर्गत १३२ केभीमा शनिबार चार्ज भएको आयोजना प्रमुख चिरन्तन विक्रम राणाले बताए ।

उनले भने, ‘उक्त लाइनखण्ड चार्ज भएसँगै दोर्दी कोरिडोरमा निर्माण सम्पन्न भएका २७ मेगावाटको दोर्दी खोला जलविद्युत आयोजना, २५ मेगावाटको माथिल्लो दोर्दी ए जलविद्युत आयोजना, १२ मेगावाटको दोर्दी खोला-१ जलविद्युत आयोजना र ८ दशमलव ६३ मेगावाटको चेपे खोला जलविद्युत आयोजना गरी हाललाई ७२ मेगावाट उत्पादित विद्युत् राष्ट्रिय प्रसारण ग्रिडमा जोड्ने बाटो खुलेको छ ।

राणाका अनुसार राष्ट्रिय प्रसारण ग्रिडको ब्याकफिड पाएपश्चात उल्लेखित जलविद्युत आयोजनाहरू परीक्षण उत्पादन तथा प्रसारण गरी ग्रिडमा जोडिनेछन् । चितवनदेखि तनहुँ, लमजुङ हुँदै मनाङसम्म २२० केभी प्रसारण लाइन परियोजना निर्माणको काम पनि धमाधम भइरहेको छ ।