काठमाडौँ– नेकपा एकीकृत समाजवादीका अध्यक्ष माधवकुमार नेपालले देश र समाजलाई परिवर्तन गर्ने भावनाका साथ अघि बढ्न निर्देशन दिएका छन् । 

पार्टी स्कुल विभागले बिहीबार भक्तपुरमा आयोजना गरेको कार्यक्रममा अध्यक्ष नेपालले आफैबाट रूपान्तरणको सुरुवात गर्दै देश र समाज परिवर्तन गर्ने उद्देश्यका साथ अघि बढ्न नेता तथा कार्यकर्तालाई निर्देशन दिएका हुन्।

सिद्धान्त र व्यवहारकोबीचमा खाडल नराखी इमान्दारितापूर्वक देश र जनताप्रति समर्पित हुनुपर्ने उनको भनाई छ । अध्यक्ष नेपालले विगतमा भएका त्रुटिहरूलाई सच्चाइ आफूसँग भएका ज्ञानलाई व्यवहारमा उतार्नुपर्नेमा जोड दिए । पार्टीले अघि सारेका बिचारहरुलाई स्थापित गर्दै सबै प्रदेशमा स्कुल विभागहरू गठन गरिने उनको भनाई छ । 

कार्यक्रममा स्कुल विभागकी प्रशिक्षण कार्यक्रममा सहभागीहरूलाई प्रमाणपत्र वितरण गरिएको थियो ।